Скромно се најавуваше цело лето, но од денес е сосема јасно, Милан тргна по Душан Влаховиќ и ќе направи сè за да го доведе во своите редови од големиот ривал Јувентус.
На српскиот напаѓач му истекува договорот со „старата дама“ на крајот од сезоната, и и тој и клубот сакаат трансфер уште сега. Новиот тренер на Милан, Масимилијано Алегри, под чие водство Влаховиќ го играше својот најдобар фудбал во Јуве, знае дека Душан му е потребен за да ги врати „росонерите“ на врвот на Серија А и издал наредба да се тргне по него.
„Газета дело Спорт“ пишува дека Милан веќе подготвил понуда за која верува дека ќе биде доволна за да се обезбеди потписот на Влаховиќ, иако условите не се ни приближни на оние кои ги има во Јувентус.
Милан му нуди 6.000.000 евра по сезона – што е двојно помалку од платата што би ја заработил оваа сезона како играч на Јувентус.
Сепак, понудата содржи и бонуси поврзани со постигнати голови и освојување титули, како и дополнително зголемување на платата доколку Милан се пласира во Лигата на шампионите.
Влаховиќ со одбивањето на „мега-понудата“ од Ал Хилал веќе покажа дека парите не му се приоритет и дека сака да игра за голем европски клуб. Поради тоа, овој трансфер делува повеќе од реален.
Јувентус бара обештетување од 19.500.000 евра. Милан ќе се обиде да ја намали таа сума, бидејќи станува збор за играч на кој му е последна година од договорот, но желбата е тука и Влаховиќ никогаш не бил поблиску до „Сан Сиро“, дури и ако остане истата сума.
