Хозе Мигел Гонзалес – Мичел поднесе оставка од тренерската позиција на Олимпијакос по ремито 2-2 со Арис во второто коло од плејофот во грчката Суперлига.
Поранешниот играч за врска на Реал Мадрид и репрезентацијата на Шпанија, Мичел, привремено ќе биде заменет од неговиот француски помошник Жозе Аниго.
Олимпијакос, кој е шампион на Грција од минатата година, останува третопласиран на табелата со 60 бода, три помалку од второпласираниот Панатинаикос и првопласираниот АЕК Атина. Тимот исто така беше трет на крајот од регуларниот дел од сезоната.
60-годишниот Шпанец пристигна во Олимпијакос откако раководеше со Олимпик Марсеј, Малага и со Хетафе. Во неговиот прв ангажман во грчкиот клуб помеѓу 2013 и 2015 година, тој освои две титули во лигата и еден Куп.
