Тимот на Интер Мајами запиша импресивна победа од 5-1 против Њујорк Ред Булс во натпревар од регуларниот дел на сезоната во американската МЛС – лига.
Благодарение на овој успех, „чапјите“ се доближија на само седум бодови од лидерот Синсинати во Источната конференција, а имаат и три натпревари помалку поради учеството на Светското клупско првенство.
Иако натпреварот започна добро за Њујорк, кои поведоа во 14. минута преку Александер Хак, Интер Мајами направи целосен пресврт уште до крајот на првото полувреме. Во 24. минута израмни Жорди Алба, а три минути подоцна Теласко Сеговиа донесе водство од 2-1.
Во третата минута од судиското продолжение на првиот дел, Сеговиа постигна уште еден гол по индивидуална акција.
Во второто полувреме, сцената ја презеде Лионел Меси. Во 60. минута зголеми на 4-1, а во 75. минута го постави конечниот резултат.
Во следниот натпревар, Интер Мајами ќе се соочи токму со Синсинати – тимот што неодамна ги совлада со убедливи 3-0.
