Ѕвездата на Реал Мадрид, Килијан Мбапе, ќе го носи дресот со број „10“ во новата сезона, откако легендата Лука Модриќ официјално го напушти клубот. Информацијата ја потврдуваат повеќе шпански и меѓународни медиуми, вклучувајќи го и „АС“, кој открива детали за целата позадина на оваа симболична промена.
Во својата прва сезона на „Сантијаго Бернабеу“, Мбапе го носеше дресот со број „9“, уште еден иконски број во историјата на клубот. Откако трансферот беше објавен минатата година, интересот за неговиот дрес достигна невидени размери – „Адидас“ едвај ја покри побарувачката, а приходите од продажбата беа рекордни.
Уште во мај, клубот се консултирал со Мбапе дали би прифатил да ја замени „деветката“ со „десетката“, што играчот доброволно го прифатил. Бројот „10“ во Реал има богата историја – го носеле имиња како Луиш Фиго, Месут Озил, Весли Снајдер, Кларенс Сидорф, Робињо, Михаел Лаудруп и Роберт Просинечки.
Интересно е што Мбапе и во француската репрезентација го носи токму тој број, па од сега и во клубот и во националниот тим ќе настапува со истиот симбол.
Доколку Мбапе не се согласел на промената, бројот „10“ најверојатно ќе му бил понуден на Арда Ѓулер или на Џуд Белингем. Сега, останува да се одлучи кој ќе ја добие „ослободената“ деветка. Главни кандидати се Ендрик или младата сензација Гонзало Гарсија, кој импресионираше на Светското клупско првенство.
Со оваа промена, Реал не само што го нагласува статусот на Мбапе како водечка фигура во новата ера на клубот, туку и отвора нова маркетиншка етапа, која веќе ветува милионски приходи од продажба на дресови со новиот број.
