Манчестер Сити размислува за сензационален трансфер во јануари како одговор на повредата на Родри, кој е надвор од игра до крајот на сезоната поради повреда на коленото. Според шпанскиот „Фичајес“, клубот планира да понуди рекордна сума за младиот талент на Пари Сен Жермен, 18-годишниот Ворен Заир-Емери, за да го засили средниот ред.
Иако досега беа споменувани имиња како Мартин Зубименди (Реал Сосиедад), Едерсон (Аталанта) и Тијани Рејндерс (Милан), Заир-Емери се издвојува како приоритет.
Младиот Французин дебитираше за првиот тим на ПСЖ во 2022 година, а веќе се етаблира како клучна фигура во составот на Луис Енрике. Со 88 настапи, седум голови и осум асистенции за клубот, тој стана и редовен дел од француската репрезентација, за која има шест настапи и еден гол од својот дебитантски повик во ноември 2023 година.
Манчестер Сити е подготвен да инвестира 120 милиони евра за неговото доаѓање, што би го направило најскап трансфер во историјата на клубот, надминувајќи го трансферот на Џек Грилиш (117 милиони евра во 2021 година).
Овој потег не само што ќе го засили средниот ред на „граѓаните“ за тековната сезона, туку и ќе донесе долгогодишна перспектива за тимот на Пеп Гвардиола.
