Македонија оди ниво погоре, а има сериозна шанса и за мундијалски бараж

МАКФУДБАЛ во Ереван,

Фудбалската репрезентација на Македонија ја победи Ерменија со 0-2, со головите на Бојан Миовски и на Исник Алими и речиси го осигура првото место на табелата кое води во Лигата Б, досега највисоко ниво во кое ќе игра нашиот национален тим.

Покрај тоа, остварен е историски резултат, три победи во низа без примен гол. Ова се случува првпат во историјата на македонскиот репрезентативен фудбал.

Можеби и најважно, Македонија сега има 10 бода и уште два меча пред себе на домашен терен, а тоа се потенцијални 16 бода, со кои многу веројатно би биле и една од четирите најдобри селекции во Лигата на нации, а за нив има место во дополнителни бараж натпревари и борба за пласман на Светското првенство во 2026 година.