Македонија ЃП одигра 2-2 на градското дерби против Работнички на Националната арена „Тодор Проески“. Клубот од Ѓорче Петров реагира на судењето на Дејан Неделкоски и тврди дека двата гола на Работнички се постигнати од офсајд позиции, а како потврда испрати и видео-материјал.
„Судии како Дејан Неделковски не заслужуваат да носат знак на ФИФА, кога на еден дерби натпревар не може да увиди два офсајди по кои се постигнати два гола и тоа на штета на еден клуб. Ако немаше намера да нè оштети, тогаш е јасно дека нема капацитет да суди вакви важни натпревари. Сакаме да потенцираме дека ниту еден судија или пак некој друг, ќе нè спречи во намерата да избориме излез во Европа ова лето. Единствено што бараме е судиската организација да ги отвори очите и да ги санкционира судиите што прават грешки, бидејќи и на други натпревари бевме оштетени сезонава поради нивни одлуки“, вели Нестор Матевски, спортскиот директор на Македонија ЃП.
