Сан Марино го победи Лихтенштајн со 1-0 во првото коло од Лигата Д на Лигата на нации. Првата и историска победа во ова натпреварување за Сан Марино ја донесе 19-годишниот Нико Сенсоли во 53. минута.
Ова беше прва победа на Сан Марино по 20 години, четири месеци и осум дена, односно по дури 142 натпревари.
Пред овој натпревар Сан Марино последен пат победи на 24 април 2004 година кога исто така го победи Лихтенштајн, но тоа беше пријателски натпревар.
Голот на Сан Марино беше доста среќен бидејќи топката несмасно ја промаши стоперот Сандро Визер кој наивно ја испрати топката кон сопствениот гол. Таму најдобро се снајде младиот Сенсоли, кој ја искористи ситуацијата и погоди за голема радост на најслабата репрезентација во светот.
По победата на социјалните мрежи кружи видео од соблекувалната на Сан Марино. Секако, фудбалерите беа воодушевени. Фудбалерите на таа репрезентација играат во клубови од нивната мала земја и во италијанските пониски лиги, најчесто аматерски тимови.
Во оваа група од Лигата на нации е и репрезентацијата на Гибралтар. Сан Марино е последната, 210-та репрезентација на ранг-листата на ФИФА, додека Лихтенштајн моментално го држи 199-то место.
