Голманот на Реал Мадрид, Тибо Куртоа, изрази големо разочарување поради тешкиот пораз од 0-4 против Пари Сен Жермен во полуфиналето на Светското клупско првенство. Белгиецот истакна дека ова е болна, но поучна лекција за неговиот тим.
„Тие секогаш почнуваат силно, а ние не го следевме планот на тренерот да го искористиме просторот во нападот. Имавме проблеми да ја задржиме топката, а кога тие вршеа притисок, одлично ги пронаоѓаа слободните соиграчи и креираа шанси. Во второто полувреме имавме поголем посед, но не создадовме доволно. Првите два гола го одлучија натпреварот – тие играа слободно, а ние се мачевме. Пораз што боли, но мораме да учиме од вакви ситуации. На добар пат сме, но вакви удари нè потсетуваат дека има уште многу да се работи. Тие ја освоија Лигата на шампионите и се силни на овој турнир, а ние треба да го достигнеме нивното ниво следната година“, изјави Куртоа.
Тој исто така додаде дека тимот мора внимателно да ги анализира грешките.
„Постојано задоцнувавме во реакциите, а кога ќе задоцниш, целата одбрана е во неред. Тие брзо напаѓаа, ние моравме да се враќаме, и така губевме контрола. Не бевме подобри од нив, и тоа е сериозен проблем. Кога му даваш толку простор на противникот, многу тешко е да го сопреш.“
Сепак, имаше и позитивни вести за „кралскиот клуб“. Куртоа ја поздрави веста за враќањето на повредените Едер Милитао и Дани Карвахал.
„Среќни сме што се вратија. Сега следува краток одмор, и одлично е што повторно се со нас. Тоа е големо засилување за тимот. Жал ми е за заминувањето на Лука Модриќ и Лукас Васкес – тие се вистински легенди на Реал Мадрид и им посакувам сѐ најдобро“, заврши белгискиот голман.
