Светската фудбалска легенда Едсон Арантес до Насименто, познат по прекарот Пеле, кој почина синоќа на 82-годишна возраст, остава богатство со нето вредност од повеќе од сто милиони долари, пренесува „АС“. Иако заработуваше многукратно помалку од сегашните фудбалери, тој беше најплатениот спортист во своето време.
Поранешниот бразилски фудбалер од самиот почеток претпочиташе да го инвестира својот профит во недвижен имот. Една од неговите големи зделки беше купувањето на импозантна палата во Хемптонс, Њујорк, за 100.000 долари, која ја продаде во 2018 година за три милиони долари.
Пеле добиваше пензија во својата земја од 2014 година, како што објави пред извесно време „Кориере дела сера“. Фудбалската легенда добиваше месечна пензија од речиси три илјади реали, околу 552 евра.
„По Светското првенство во 2014 година ќе бидам полноправен пензионер, бидејќи по закон веќе сум“, призна Пеле во интервју за бразилскиот магазин „Веја“.
Сепак, не целото богатство на Пеле дојде директно од фудбалот. „О Реи“ знаеше како да продолжи да генерира приходи по повлекувањето од теренот благодарение на неговите бројни рекламни договори. Тој беше меѓу најбараните рекламни фигури за најскапите и најголемите светски брендови за часовници и банкарски картички.
„Не се збогатив од фудбалот како денешните играчи. Заработував од реклами кога престанав да играм, но не од тутун, алкохол, политика или религија“, еднаш нагласи легендарниот Бразилец.
Покрај трите поранешни сопруги, право на негово наследство ќе имаат и седум деца. Ќе поделат 100 милиони долари.
