Стрелецот на голот во триумфот (0-1) против Италија, Александар Трајковски, „десетката“ на македонскиот национален тим Енис Барди, и селекторот Благоја Милевски, денеска добиваат дипломатски пасоши по итна постапка.
Министерот за надворешни работи, Бујар Османи, информираше дека двајцата фудбалски репрезентативци и селекторот Благоја Милевски ќе добијат дипломатски пасоши поради постигнатиот успех и големата историска победа против актуелниот европски шампион Италија.
„Станува збор за Александар Трајковски и Енис Барди, како и селекторот Благоја Милевски. Тие се нашите најдобри амбасадори во моментов и го заслужуваат пасошот, како одделен доказ за нивните успеси. Им посакувам успех и во Португалија. Пасошот ќе го добијат во 12.30 часот“, изјави Бујар Османи.
