Тренерот на ФЦСБ, Елиас Караламбус, не го криеше разочарувањето на прес-конференцијата по поразот од Шкендија со 1-0 во второто квалификациско коло за Лигата на шампионите. Тој ја презеде одговорноста за неуспехот и најави дека мора да се направат промени доколку тимот сака да се пласира понатаму.
„Одигравме многу слабо. И во претходното коло загубивме на гости против тимот од Андора, и сега истото ни се повторува. Јасно е дека не сме на потребното ниво. Единствено позитивно е што голманот беше расположен и нè спаси од повисок пораз“, изјави Караламбус, додавајќи:
„Секоја чест за Шкендија, нивната победа е сосема заслужена. Се чувствувам одговорен за резултатот и ќе мора детално да ги анализираме грешките, особено од тактички аспект, за да бидеме подобри во реваншот во Букурешт. Воопшто не го потценивме противникот, напротив, пристапивме мотивирано. Шкендија е сериозна екипа и затоа ќе се подготвиме со максимална посветеност за натпреварот што следува“.
