Менаџерот на Манчестер Сити, Пеп Гвардиола, со насмевка го прокоментира пијанството на Џек Грилиш. Играчот е снимен како му се забранува влез во бар, откако изгледа неадекватно и во видно алкохолизирана состојба, а со него биле и неговите соиграчи Кајл Вокер и Ријад Махрез.
„Толку сум вознемирен затоа што не ме поканија. Не ми се допаѓа. Следниот пат ќе можат да ме поканат на вечера“, се пошегува Гвардиола. „Видеото не покажува што точно се случило, но ќе бидат казнети затоа што не ме поканија и мене“, истакна стратегот на Манчестер Сити.
Гвардиола уште еднаш беше прашан за неговата иднина откако се појавија информации дека би можел да потпише нов договор. Неговиот актуелен договор е до 2023 година.
„Освоивме многу и продолжуваме да победуваме. Да не беше така, немаше да бидам овде и по шест сезони. Имам уште една и пол година од актуелниот договор. Тоа е долго време во светот на фудбалот. Има многу отпуштени тренери оваа сезона, не само во Англија туку и ширум светот“, одговори Гвардиола.
