Шкупи и Академија Пандев одиграа голеада (3-3) во Кичево, а актуелниот првак пропушти и втора шанса да се искачи на врвот на табелата. Тимот од Чаир имаше 3-2 до пред крајот, но младиот Трајков во 90.минута погоди за израмнување.
Составот на Гоце Седлоски поведе со голот на Реналдо Цефас во 12.минута, но потоа следуваше добар период за гостите. Ване Крстески со прекрасен гол израмни на 1-1 во 27.минута, а Агрон Руфати направи пресврт во 36.минута.
Но, и тоа не беше сѐ. Шкупи израмни веќе во следниот напад со голот на Мамаду Данфа, а Валид Хамиди во последните мигови од првиот дел повторно донесе предост за 3-2.
Сепак, резервистот Трајков во финишот искористи една шанса и донесе важен бод за Академија Пандев.
Работнички беше убедлив против ФК Скопје во Велес и славеше со 4-0. Крсте Велковски постигна хет-трик, а последниот погодок беше дело на Гандо Биала.
Останатите натпревари од 21.коло во Првата фудбалска лига се играат утре: Брегалница – Шкендија, Победа – Силекс, Македонија ЃП – Тиквеш.
