Иднината на Виктор Осимен е пред својот расплет – турскиот гигант Галатасарај и италијанскиот Наполи се на чекор до постигнување целосен договор за трансферот на нигерискиот напаѓач.
Според последните информации, трансферот ќе се реализира за сума од 75 милиони евра, исплатена во два дела: 40 милиони веднаш и уште 35 милиони до крајот на 2026 година.
Со тоа, Осимен ќе стане најскапото засилување во историјата на Галатасарај, додека за Наполи ова ќе биде втората највисока продажба, веднаш по трансферот на Гонзало Игуаин во Јувентус во 2016 година за 90 милиони евра.
Внимание привлекува и една специфична клаузула – таканаречената „анти-италијанска клаузула“, која го спречува Галатасарај да го препродава Осимен на било кој клуб од Серија А до јуни 2027 година. Во случај на прекршување, турскиот клуб ќе мора веднаш да ја исплати целата трансферна сума.
Очекувањата се дека трансферот ќе биде официјализиран во наредните денови. Со тоа, Галатасарај ќе добие моќно засилување во нападот, додека Наполи ќе оствари значаен финансиски бенефит од заминувањето на една од своите најголеми ѕвезди.
