Поранешната ѕвезда на англиската Премиер – лига, Енди Керол, потпиша двегодишен договор со францускиот Бордо, кој испадна поради административни причини во Насионал 2, или четвртата дивизија, соопштија од клубот.
Англичанецот досега играше за друг француски клуб, Амиен, кој се натпреварува во Лига 2. Трансферот се реализираше благодарение на спортскиот директор на Амиен, Џон Вилијамс, кој се зафати со летните трансфери на Бордо, со цел историскиот француски клуб да се врати во Насионал – односно трета дивизија, во следната сезона.
Енди Керол е поранешен напаѓач на Ливерпул, Њукасл и Вест Хем, и има девет натпревари и два гола за националната репрезентација на Англија.
Тренерот на Бордо, Бруно Ирл, очекува дополнителни засилувања во нападот и во средниот ред. Бордо ја обезбеди лиценцата за учество во првенството и ќе игра против Шатобриан овој викенд.
