Македонскиот репрезентативец Елиф Елмас продолжува со одличните настапи во дресот на Торино. Во натпреварот против Парма, одигран на „Енио Тардини“ во рамките на 28. коло од Серија А, Елмас го постигна својот трет гол за „биковите“ на четири натпревари.
Тој го отвори резултатот во 19. минута со прецизен удар во спротивниот агол, поставувајќи 0-1. Во 69. минута беше заменет, а натпреварот заврши со резултат 2-2.
Од неговото пристигнување во Торино на позајмица од Лајпциг, Елмас веднаш се истакна. На своето деби против Болоња, влезе во игра во второто полувреме и по само неколку минути постигна фантастичен гол, иако неговиот тим загуби со 3-2.
Венеција во последните мигови извлече реми (1-1) на гостувањето кај Комо. Водеше екипата на Цеск Фабрегас со голот на Џонатан Иконе речиси цело второ полувреме, а во завршницата Гиткјаер реализира од белата точка за израмнување.
