Македонската фудбалска репрезентација продолжува со подготовките за клучните квалификациски натпревари за пласман на Светското првенство 2026, каде што најпрвин ќе се соочи со фаворизираната Белгија, а потоа и со Казахстан.
Еден од новите имиња во составот е Стефан Деспотовски, кој со нетрпение го чека својот деби настап во националниот дрес. Младиот играч со голема самодоверба и почит зборуваше за предизвикот што го носи првиот дуел.
„Горд сум што сум повикан и што имам можност да бидам дел од овој тим. Атмосферата е одлична, сите ме прифатија топло. Знаеме дека Белгија е сериозен противник, но ако бидеме дисциплинирани и не им дозволиме да ја водат играта, можеме да им парираме. Клучно ќе биде да ги следиме инструкциите на селекторот и да бидеме компактни, особено во дефанзива“, изјави Деспотовски.
Тој потенцираше дека постои одреден притисок, но верува дека тимот е подготвен и ментално и физички.
„Притисокот е нормален на ова ниво, но тренираме за тоа и мислам дека ќе бидеме подготвени. Најмногу внимание ќе посветиме на одбранбената организација – таму не смееме да правиме грешки“, додаде тој.
Натпреварот Македонија – Белгија ќе се одигра на 6 јуни (петок) од 20:45 часот на националната арена „Тодор Проески“ во Скопје, а се очекува полн стадион и силна поддршка од домашната публика.
