Херојот за Арсенал во синоќешната победа од 3-0 над Реал Мадрид, Деклан Рајс, влезе во историјата на Лигата на шампионите. Тој стана првиот играч што постигнал два гола од директен слободен удар во еден натпревар од нокаут фазата на турнирот.
Во групната фаза вакво нешто претходно постигнале: Ривалдо (со Барселона против Милан, 2000 г.), Кристијано Роналдо (со Реал Мадрид против Цирих, 2009 г.), Нејмар (со ПСЖ против Црвена звезда, 2018 г.) и Хаким Зијеш (со Галатасарај против Манчестер Јунајтед, 2023 г.).
„Кај првиот гол, идејата ми беше да центрирам. Но кога ја видов ѕидот и позицијата на голманот, си помислив: ‘Зошто да не шутирам директно?’ Букајо Сака ме поддржа и ми рече да му се препуштам на инстинктот. На тренинзи сум пробувал вакви удари, но често ја погодував ѕидот или топката одеше над голот.
Кога за втор пат застанав зад топката за слободниот удар, веќе имав самодоверба и не размислував дали да шутирам. Секако дека сум возбуден и среќен, но мислам дека ќе поминат неколку години пред да сфатам колку специјална беше оваа вечер“, изјави Рајс.
Тој го прокоментира и настапот на Букајо Сака, кој се врати на теренот по подолга пауза поради повреда. Сака беше фаулиран за двата слободни удари од кои Рајс постигна голови.
„Неверојатно е колку брзо се опорави. Тој е прекрасно момче. Мора да бидеме подготвени за следната недела. ‘Бернабеу’ е посебно место, таму не е лесно да се игра“, истакна Рајс.
