Тренерот на Баер Леверкузен, Чаби Алонсо, изјави дека неговата екипа заслужува да освои тројна круна оваа сезона.
Тимот на Алонсо одигра 2-2 во реваншот со Рома и се пласираше во финалето на Лига Европа со вкупен резултат 4-2.
Баер Леверкузен веќе ја освои титулата во Бундеслигата, стигна до финалето на Купот на Германија кое ќе се игра на 25 мај и синоќа го забележа рекордниот 49. натпревар без пораз во сите натпреварувања.
Баер Леверкузен го собори долгогодишниот европски рекорд на Бенфика, поставен од 1963 до 1965 година, за најдолга серија без пораз.
„Ќе играме две финалиња во една недела. Покажавме одличен карактер по нивниот втор гол. Потоа ги погледнав моите играчи во очи и видов дека сакаат повеќе. Сè уште имаме шанса да освоиме три трофеи. И моите момчиња ги заслужуваат сите три“, изјави Чаби Алонсо.
Баер Леверкузен имаше среќа кога дефанзивецот на Рома, Џанлука Манчини, во 82. минута ја испрати топката во сопствената мрежа.
Замената Јосип Станишиќ потоа постигна гол за израмнување непосредно пред последниот судиски свиреж и го испрати Баер Леверкузен во книгата на рекорди. Потоа рече дека тоа е еден од најголемите моменти во неговата кариера.
„Дефинитивно еден од нив. Знаевме што е во прашање, навистина сакавме да стигнеме до финалето и мислам дека тоа можеше да го видите по нашиот настап во сите 90 минути“, изјави хрватскиот репрезентативец Станишиќ.
