Тренерот на Реал Мадрид, Чаби Алонсо, зборуваше по поразот на неговиот тим од Манчестер Сити со 1-2 на домашен терен во Лигата на шампионите. Позицијата на баскискиот стручњак е сериозно загрозена, бидејќи тимот има само две победи во последните осум натпревари, а дел од раководството веќе бара негово разрешување.
„Натпреварот беше многу неизвесен и се играше на моментуми. Почнавме многу добро со гол и многу шанси, го правевме тоа што го посакувавме. Но, кога не сме во најдобар момент, во следните минути направивме многу малку во напад. Се обидовме, но ја загубивме иницијативата и поради проблемите, повредите. Им благодарам на играчите за реакцијата, но мора да продолжиме. Моментот не е добар, во критична ситуација сме и бараме многу од самите себе. Но мислам дека и ова ќе помине, затоа што сè минува“, рече Алонсо.
„Целта е да бидеме постојани и да играме подобро, без разлика на противникот. Сега игравме против силен ривал во Лигата на шампионите и ми се чини дека направивме доволно за барем реми, па дури и нешто повеќе. Тимот беше концентриран, имаше ритам, дозволивме малку опасности во првите триесет минути. Родриго, кој одигра одличен натпревар, постигна гол. Се обидувавме до крај и треба да гледаме напред“, смета тренерот.
„Нормално е да има свирежи, таков е теренот тука кога не победуваш дома. Но имаше и моменти кога навивачите нѐ поддржаа, ни дадоа голема енергија. Можеме да ги разбереме свирежите на крајот, затоа што тука барањата се големи“, призна Алонсо.
„Резултатите се такви какви што се, вие ги интерпретирате. Ова не е нова ситуација за многу тренери, мора да се справиме со неа, особено во Реал Мадрид. Треба да пристапиме со одговорност, самокритика, но знаеме дека работите можат да се променат. И покрај резултатот, видов позитивни работи“, додаде Чаби Алонсо.
