Легендарниот шпански дефанзивец Серхио Рамос може да ја продолжи кариерата во Премиер – лигата, а култниот Манчестер Јунајтед се споменува како потенцијална дестинација.
Според информациите објавени од „Кадена СЕР“, Рамос самиот се понудил на англискиот клуб. По заминувањето од мексиканскиот Монтереј, искусниот дефанзивец повторно е слободен да избере нов тим.
Раководството на Манчестер Јунајтед сериозно ја разгледува оваа можност. Се смета дека огромното искуство на Рамос би било од непроценлива корист за развојот на младите таленти во одбраната, како Лени Јоро, Ејден Хевен и Патрик Доргу, како и за младото голманско име Сен Ламенс.
Серхио Рамос сè уште има амбиции да игра за шпанската репрезентација на претстојното Светско првенство. Тој верува дека трансфер во клуб од калибарот на Манчестер Јунајтед ќе биде јасен сигнал до селекторот Луис де ла Фуенте дека сè уште поседува квалитети за највисоко ниво на фудбалот.
Со 180 настапи за националниот тим, Рамос е жива легенда на шпанскиот фудбал. Со „Ла Фурија Роха“ освоил две Европски првенства и Светското првенство во 2010 година во Јужна Африка. Неговата клупска кариера, исполнета со трофеи со Реал Мадрид, вклучуваше и периоди во Пари Сен Жермен и родниот клуб Севилја.
По краткиот престој во Мексико, Рамос е подготвен за враќање на големата европска сцена. Главната цел, како за него така и за Јунајтед, би била враќање во Лигата на шампионите, со оглед дека клубот од „Олд Трафорд“ не учествува во европските натпревари оваа сезона. Ќе биде интересно да се види дали новиот менаџер Рубен Аморим ќе ја препознае можноста во Серхио Рамос да добие лидер и ментор за својот млад тим.
