Министерството за внатрешни работи соопшти дека синоќа околу 20:30 часот, службите на скопскиот аеродром уапсиле еден навивач, додека на други 10 им било забранет влез во Македонија.
Лицата биле под дејство на алкохол и по слетувањето не ги почитувале правилата, се однесувале агресивно и ги вознемирувале останатите патници.
„На 10.12.2025 околу 20:30 часот во СВР Скопје, од службите на Меѓународниот аеродром Скопје и од Регионалниот центар за гранични работи Север е пријавено дека во авион кој пристигнал од Словачка, повеќе лица под дејство на алкохол, кои се дел од навивачка група, за време на летот и по слетувањето не ги почитувале правилата, се однесувале агресивно и ги вознемирувале останатите патници и екипажот.
Полициски службеници веднаш пристигнале на местото и по преземени мерки го приведоа Л.Т. (38) од Словачка, а на 10 други лица, исто така од Словачка, не им бил дозволен влез во државата од безбедносни причини. По целосно документирање на случајот, против Л.Т. ќе биде поднесена соодветна пријава“, соопшти МВР.
