Битка за опстанок во Кратово: Силекс и Вардар во директен дуел за бегство од дното

Силекс и Вардар заедно имаат огромен број трофеи во македонскиот фудбал, но оваа сезона влегоа во опасната зона. Оттаму денешната пресметка (13 часот) во Кратово е од огромно значење за двата тима. Поразениот ќе падне во опасната зона и ќе има многу потешкотии да обезбеди опстанок во елитата.
Свесни се за тоа и Горан Симов и Никола Илиевски Џиџи и ќе се обидат да ги подготват фудбалерите за голема битка.

„Знаеме дека ова е еден од клучните натпревар. Добро е познато во каква тешка ситуација е клубот, но тоа што може сите фудбалери да го ветат е максимален ангажман во желбата да оствариме позитивен резултат од Кратово“, истакна тренерот на Вардар, Никола Илиевски – Џиџи, кој неодамна го победи коронавирусот и се врати на тренинзите на тимот.

Силекс се пласира во финалето на Купот на Македонија откако ја елиминира Струга Трим Лум, но и тогаш Горан Симов потенцираше дека тимот мора да се фокусира на мечот против Вардар.

„Направивме историски успех во Купот, но мораме да се насочиме веднаш на мечот против Вардар. Тоа е еден многу важен натпревар за нас со оглед на позициите на табелата“, изјави Горан Симов.

Вардар во моментот е на десеттата позиција на табелата со 27 бода колку што има и Ренова, а Силекс е на 11. место, со 26 бода.