Четвртата победа во првенството Силекс ќе ја бара на гостувањето во Гостивар против Арсими. Мечот, кој се игра во сабота од 16:30 часот, ќе биде прв гостински дуел за кратовскиот тим, со оглед дека досега одигра два натпревари на свој терен, а еден го доби со службени 3-0 против Шкупи.
Кратовчани во досегашните три кола немаат примено гол, а капитенот Дарко Анѓелески се надева дека серијата на победи и „чиста мрежа“ ќе продолжи и по гостувањето во Гостивар.
„Сакаме во Гостивар да одиграме добар натпревар, да наметнеме наш ритам од првата минута и со поволен резултат да се вратиме во Кратово. Се надевам дека ќе ја продолжиме серијата на победи и натпревари без примен гол. Играме против добар тим со доста нови фудбалери во своите редови. Добро ги анализиравме, цела недела се подготвувавме за овој натпревар и сметам дека ако ги исполниме задачите од стручниот штаб од првата до последната минута, со поволен резултат ќе си заминеме од ова гостување“, изјави Анѓелески за сајтот на ФФМ.
Играчот од средниот ред на Силекс истакнува дека амбициите на клубот и оваа година се насочени кон европските натпреварувања:
„Амбициите на Силекс се исти како и минатата година, местата што водат во Европа. Секако, ако имаме шанса да се бориме и за титулата, ќе се обидеме максимално да ја искористиме. Најважно е да бележиме добри резултати, да влегуваме мотивирани во секој меч и да одиме на трите бода.“
