Александар Митровиќ е на чекор до заминување од Ал-Хилал, а околу неговата следна дестинација се водат интензивни дискусии. За капитенот на репрезентацијата на Србија има интерес од повеќе клубови, а новите информации од Англија откриваат дека повратникот во Премиер – лигата, Лидс Јунајтед, размислува да го доведе во своите редови.
Иако во Саудиска Арабија прикажуваше одлични партии, со доаѓањето на Симоне Инзаги неговата улога во Ал-Хилал значително се промени, што го приближи кон излезната врата.
Митровиќ веќе има богато премиерлигашко искуство со Њукасл и Фулам, каде остави силен впечаток. На 30 години, тој е и најдобриот стрелец во историјата на репрезентацијата на Србија со 62 постигнати погодоци.
