Нејмар потврди дека би сакал повторно да игра покрај Лионел Меси, со што на медиумите им даде навестување за можен трансфер од Саудиска Арабија во САД. Бразилскиот напаѓач е член на Ал-Хилал и е повреден подолго време, а според некои пишувања можеби веќе го одиграл последниот натпревар за саудискиот клуб.
Меси моментно е член на Интер Мајами каде што е опкружен со поранешните соиграчи од Барселона, Луис Суарез, Жорди Алба и Серхио Бускетс. Играше со Нејмар во Пари Сен Жермен, а со него и Суарез го формираа легендарното напаѓачко трио на Барса – „МСН“.
„Се надевам дека повторно ќе играме заедно. Лео е одлична личност. Мислам дека е среќен, а ако е среќен, јас сум среќен поради него”, изјави неодамна Нејмар, кој го пропушта остатокот од сезоната поради повреда на коленото.
Позната е желбата на Најмер да се испроба во МЛС-лигата. Минатата година на прашањето дали ќе се пензионира во родниот Бразил, тој одговори дека не е сигурен во тоа и дека би сакал да игра во Соединетите Американски Држави.
Нејмар минатата година пристигна во Ал-Хилал и потпиша договор до крајот на сезоната 2024/25, наводно за 200 милиони евра. Пред повредата постигна еден гол на пет натпревари.
