Тренерот на Реал Мадрид, Карло Анчелоти, изрази уверување дека утрешното Ел Класико против Барселона ќе биде само почеток во ривалството што и оваа сезона ќе го имаат двата тима во различни натпреварувања. Исто така, италијанскиот стратег потврди дека ѕвездата на „кралевите“, Џуд Белингам, е целосно подготвен за пресметката со Каталонците.
„Тимот е мотивиран, претстои важен и посебен натпревар. Ова ќе биде прво Ел Класико сезонава, но ќе има уште, за Суперкупот, реваншот, за Купот, во Лигата на шампионите… Има толку многу можности за повторно средба, па имам чувство дека утрешното издание ќе биде само прво во текот на сезоната. Белингам ќе игра утре бидејќи е добар и се опорави. Нема потреба да му објаснувам за Ел Класико. Сите знаат за тоа, тоа е светски познат меч. Овој дуел е многу важен, но сезоната е долга и премногу е да се каже дека само овој ќе го реши шампионатот“, вели Карло Анчелоти.
„Барселона е одличен тим, не само во нападот, туку и во одбраната. Во оваа сезона во нивниот тим влегоа млади момчиња со големи квалитети. Ја очекуваме вообичаената Барса. Фермин Лопес и Ламин Јамал се многу добри, но и ние маме исклучителни млади играчи како Белингам, Чуамени, Камавинга. Верувам дека нѐ очекува одличен натпревар и ние сме максималнои подготвени за надигрување“, истакна тренерот на Реал Мадрид.
