Фудбалската репрезентација на Македонија вечерва на комплексот „Петар Милошевски“ го одржа првиот тренинг од мини подготовките во пресрет на последните два квалификациски натпревари од циклусот за ЕВРО 2020 против Австрија и против Израел. Во националниот тим има и двајца дебитанти, Тихомир Костадинов од Ружомберок и Даниел Аврамовски од Вардар.
Тие во минатото беа дел од младата репрезентација до 21 година, а сега за првпат добија повик и од селекторот на А-селекцијата, Игор Ангеловски.
„Имам огромна желба е да дебитирам за Македонија, си ја сакам државата и ќе дадам се од себе во дресот на репрезентацијата. Ако ми биде дадена шанса, ветувам дека ќе ја искористам. Австријците се одлична репрезентација, но ние се предаваме, ќе одиме да одиграме најдобро што знаеме и да оствариме позитивен резултат“, изјави Даниел Аврамовски.
Тихомир Костадинов е среќен што ќе биде дел од најдобрата селекција, заедно со Пандев, Барди, Несторовски…
„Чест е да се биде дел од најдобрата селекција на Македонија, заедно со Пандев, Барди, Несторовски и останатите. Се надевам дека добро ќе се вклопам и дека ќе ја оправдам довербата. Познавам дел од фудналерите од младата селекција и верувам дека можеме да стигнеме до добри резултати на мечевите со Австрија и со Израел“, изјави Тихомир Костадинов.
На првиот тренинг не беа присутни Горан Пандев, Енис Барди, Илија Несторовски и Столе Димитриевски, тие од утре ќе се приклучат во работата со националниот тим.
