Гневот на навивачите на ПСЖ кон Лионел Меси е огромен откако нивниот клуб беше елиминиран во првата нокаут рунда од Лигата на шампионите, втора година по ред откако Аргентинецот дојде. Затоа по неуспехот сезонава против Баерн му го подготвуваат истото што го правеа лани по елиминацијата од Реал Мадрид.
Се подготвува „симфонија“ од свирежи и навреди на домашниот дерби натпревар од францускиот шампионат против Рен, единственото натпреварување во кое ПСЖ сезонава може да го земе трофејот.
Навивачите на ПСЖ се бесни на Лионел Меси бидејќи во сите четири клучни натпревари во последните две сезони не се покажа како играч за кој ПСЖ плаќа 40 милиони евра годишно. Меси немаше ниту еден гол или асистенција на натпреварите против Реал Мадрид и Баерн Минхен. На тие четири меча имаше само три удари кон голот, а најзабележително беше тоа што Куртоа минатата сезона му одбрани пенал.
Затоа ултрасите на ПСЖ најавија демонстрација на гнев.
„Ќе го исвиркаме Меси на неделниот натпревар на „Паркот на принцовите“ против Рен, затоа што и оваа година не стори ништо во Лигата на шампионите, а е преплатен вво ПСЖ. Не го сакаме веќе во клубот.“
Меси дојде во ПСЖ во летото 2021 година без обештетување, но со споменатата феноменална плата од 40 милиони евра. Неговиот договор завршува на лето, кога ќе наполни 36 години. Според француските медиуми, тој бара од ПСЖ да продолжи да добива 40 милиони евра годишно за да остане и дека му е загарантиран статус на стартер во тимот.
На 65 натпревари за ПСЖ, Меси постигна 29 и асистираше за 32 гола, но остана неефикасен во најважните натпревари.
