Повеќе од 50.000 навивачи ги пречекаа француските фудбалери на плоштадот Конкорд во Париз.
Претседателот на Фудбалската федерација на Франција, Ноел ла Грает, вчера изјави дека нема да има церемонијален пречек на фудбалерите, бидејќи сакаат веднаш по пристигнувањето во Париз да си одат дома и истакна дека никој не е расположен за шетање.
Сепак, дојде до промена на планот.
На плоштадот Конкорд владееше одлична атмосфера кога на балконот од хотелот „Кријон“ се појавија играчите и селекторот Дидие Дешамп.
Претставниците ја поздравија толпата веејќи француски знамиња.
Француската репрезентација два часа порано пристигна во Париз од Доха.
Капитенот на Франција, Хуго Лорис, беше воодушевен од поддршката на навивачите и покрај поразот во финалето.
„Ова е можност да ги поздравиме навивачите и да им се заблагодариме за поддршката и покрај поразот во финалето. По болката што ја доживеавме вчера, дојдовме да бараме утеха од нив“, изјави Лорис за француската телевизија TF1 и додаде:
„И покрај околностите и многу работи што се случија пред и за време на турнирот, ние останавме обединети и ја покажавме силата на групата. Мислам дека Французите се препознаа преку овие вредности. Мораме да продолжиме да работиме и во најдобар амбиент да го чекаме следното Европско првенство“, заклучи Лорис.
