Ѕвездата на Манчестер Јунајтед, Ентони, се најде под жестоки критики за неговиот „танц со топката“ со кој сакаше да направи забава за публиката, но истовремено можеби и да ги понижи ривалите од Шериф Тираспол во натпреварот од Лигата на Европа. Бразилецот ја контролираше топката и, иако немаше никој околу него, се вртеше околу својата оска, а потоа испрати центаршут кој заврши речиси на трибините.
Легендарниот играч за врска на Манчестер Јунајтед, Пол Сколс, воопшто не беше импресиониран од овој потег, впрочем како и менаџерот Ерик тен Хаг, кој го замени на полувремето.
„Не знам што прави. Тоа е апсурдно. Не знам што носат тие вештини. Претходно, тој не направи ништо фудбалско за време на играта. Ако водиш со 3-4 гола разлика, можеби би можел да си дозволи да го направи тоа, но на 0-0, тоа е недопустливо. Не знам каква е таа вештина. Тоа е да се биде кловн“, изјави легендата на „црвените ѓаволи“ за БТ Спорт.
