Клупскиот фудбал оди на двонеделна пауза, но играчите ќе имаат обврски со репрезентациите. Во Европа се игра Лигата на нации, а француската репрезентација ќе одигра два натпревари. На 22 септември играат со Австрија, а потоа три дена подоцна патуваат за Данска. Во првите четири кола од ЛН, „галските петли“ не вкусија победа, а атмосферата денеска дополнително ја усложни Килијан Мбапе.
Според „Л’Екип“, првата ѕвезда на тимот одбила да се појави на утрешниот ден за фотографирање каде француската репрезентација ќе се слика за промотивни цели.
Проблемот се појави во правата за фотографиите. Уште во март Мбапе самоиницијативно одлучи да бојкотира дел од спонзорите на неговата репрезентација. Потоа следеше неговата изјава за „Франс прес“, но оттогаш ништо не се промени, па Мбапе сигурно ќе продолжи со бојкотот.
Француските медиуми објавија дека фудбалерите утре ќе учествуваат во снимање реклами за спонзори како Uber Eats, KFC и Coca-Cola.
