На италијанскиот репрезентативец Марко Верати му се заканува казна за интервјуто што го даде за „Канал +“ веднаш по натпреварот на Пари Сен Жермен против Нант. Неговиот тим загуби со 1-3, а играчот од средниот ред беше нервозен од одлуките на судијата Микаел Лесаж.
„За вакви одлуки некој мора да преземе одговорност“, изјави Верати.
Етичкиот комитет на Француската фудбалска федерација го упати предметот за интервјуто на Дисциплинската комисија на Лига 1 и сега ќе се разговара за евентуална санкција која би можела да достигне и суспензија од 3 до 5 натпревари.
„Како е можно овој арбитар да ни покаже 10 карти (всушност 6)?!“ додаде Верати. „Не можевме ни да разговараме со него, ништо не можеше да се направи. Ова е единствениот судија во светот со кого не може да се зборува“, дополни италијанскиот фудбалер.
Парижаните веруваа дека противничкиот дефанзивец Денис Апија заслужи да биде исклучен. Во самиот финиш на првото полувреме, играчот на Нант на работ од шеснаесетникот го задржа Килијан Мбапе. Во првиот момент судијата покажа директен црвен картон, но по прегледот на ВАР – снимката одлучи дека не сопре шанса за гол и го смени картонот во жолт, а Апија остана на теренот.
Дефанзивецот подоцна направи уште еден тежок прекршок, но не доби второ официјално предупредување.
