Менаџерот на Челси, Томас Тухел, пристигна во Абу Даби и утре најверојатно ќе го води тимот во финалето на Светското клупско првенство против Палмеирас.
Германецот минатата сабота беше позитивен на коронавирус и ги пропушти натпреварите на „сините“ против Плимут во ФА Купот и против Ал-Хилал во полуфиналето од СКП.
Челси ќе се обиде да го освои Светското клупско првенство за првпат во својата историја. Во полуфиналето тимот го совлада Ал-Хилал со 1-0, со голот на Ромелу Лукаку.
Лондончани во битката за трофејот ќе можат да сметаат на Едуард Менди. Голманот се приклучи на тимот по триумфот со Сенегал во Африканскиот куп на нации.
