Новиот тренер на Џенова, Андриј Шевченко, ќе се обиде да доведе неколку играчи во претстојниот преоден рок, а на врвот на неговата листа е „отпишаната“ ѕвезда на Милан.
Џенова оваа сезона во Серија А се мачи со разочарувачки резултати кои ја принудија да го отпуштат тренерот Давиде Балардини и да го назначат Андриј Шевченко за негов наследник.
Најстариот италијански клуб моментно се наоѓа на 18. место на табелата во Серија А и итно има потреба од засилувања во зимскиот преоден рок за да опстане во елитниот ранг. Шевченко состави листа на потенцијални засилувања, а „отпишаната“ ѕвезда на Милан е на самиот врв на неговите желби.
Станува збор за шпанскиот офанзивец Саму Кастилјехо, кој оваа сезона е далеку од составот на „росонерите“. Тој забележа само три настапи во сите натпреварувања и многу веројатно е неговото заминување од „Сан Сиро“ во јануари.
Кастилјехо би бил совршено засилување за тимот на Шевченко и би имал многу поважна улога од сегашната во Милан.
