Работнички гостува „под Тумбе кафе“ и ќе ги одмери силите со Пелистер во осминафиналето на Купот на Македонија. Голманот Бурхан Мустафа верува дека тимот ќе се прикаже добро издание и дека ќе успее да избори пласман во следната рунда од најмасовното фудбалско натпреварување. „Романтичарите“ сакаат да се вратат во победнички ритам откако доживеаја пораз на домашен терен од Скопје во последното првенствено коло.
„Го респектираме Пелистер, тоа е квалитетен тим и моментната ситуација на табелата не го отсликува реално нивниот капацитет. Ние се надеваме дека ќе одиграме добар натпревар и посакуваме пласман во следната рунда од Купот на Македонија. Ова се специфични натпревари, нема можност за поправен и затоа мора да бидеме максимално внимателни и грешките да ги сведеме на минимум“, вели Бурхан Мустафа.
На останатите натпревари во осминафиналето на Купот се среќаваат: Шкендија – Ренова, Струга ТЛ – Борец, А.Пандев – Македонија ЃП, Вардар – Скопје, Брегалница – Охрид, Беласица – Силекс, Шкупи – Тиквеш.
