Подготвувајќи се за новата натпреварувачка сезона во која се враќа во Првата македонска фудбалска лига, ФК Беласица официјално го именуваше Ванчо Стојанов за нов спортски директор на клубот.
Стојанов, кој е поранешен учесник на три олимписки игри како атлетичар и тренер, освојувач на три балкански златни медали и рекордер на повеќе атлетски дисциплини, прогласуван девет пати за спортист на годината и е почесен граѓанин на општина Струмица, веќе три години е кондициски тренер во Беласица и дел од организициските структури на клубот.
„Благодарност за укажаната доверба од претседателот Славчо Васков – Пинда и управата на ФК Беласица за добивање на функцијата спортски директор. ФК Беласица е голем клуб и клуб со традиција, така и функцијата спортски директор претставува огромна одговорност. Честитки до нашите фудбалери, стручниот штаб и сите вработени во ФК Беласица за успехот кој го постигнавме оваа сезона, влез во ПМФЛ. Поздрав до сите фанови на нашиот клуб и ве очекуваме на претстојните натпревари на стадионот Благој Истатов“ – истакна Стојанов по промоцијата на новата функција во Беласица.
