Манчестер Сити ја следи ситуацијата во врска со договорот на Лука Модриќ во Реал Мадрид, пренесува каталонски весник „Ел Насионал“. Според овој извор, 36-годишниот капитен на хрватската репрезентација е голема желба на Пеп Гвардиола, менаџерот на Манчестер Сити.
Модриќ има договор со Реал Мадрид до крајот на сезоната и се уште не се започнати преговорите за нов договор. Тој во јануари може да потпише преддоговор со друг клуб како слободен играч.
Гвардиола, како што тврдат каталонците, има план да го доведе Модриќ. „Граѓаните“ би му понудиле една сезона да игра во Манчестер Сити, а потоа и опција да оди во партнерскиот клуб во МЛС – лигата на САД, Њујорк Сити. Претходно, Модриќ имаше неколку понуди од МЛС, но тој одлучи да остане во Реал.
