Јувентус освои само еден бод во првите две кола од новата сезона во Серија А, но и по репрезентативната пауза нови проблеми за „старата дама“. Масимилијано Алегри нема да може да смета на половина тим за дуелот со „наполитанците“.
Последниот што отпаѓа од комбинација е Федерико Киеза. Италијанскиот репрезентативец денеска направи магнетна резонанца, повреда не е утврдена, но Јувентус сепак одлучи да не ризикува, па одличниот фудбалер нема да отпатува за Неапол.
Освен Киеза, нема да играат Бразилците Алекс Сандро и Данило, кои ќе пристигнат во Италија само неколку часа пред натпреварот на стадионот „Диего Марадона“.
Очигледно, Алегри нема да може да смета на Хуан Куадрадо, Пауло Дибала и Родриго Бентанкур, кои исто така имаа обврски во квалификациите за СП во Јужна Америка.
Евентуалниот пораз против Наполи сигурно би бил огромен удар за Јувентус на стартот од сезоната.
