Академија Пандев и Силекс утре (19 часот) ќе играат во финалето на Купот на Македонија, а струмичани се надеваат дека ќе успеат да го задржат трофејот. Тие се и последни освојувачи на Купот откако минатата сезона пандемијата го наруши натпреварувањето.
„Очекуваме да го задржиме трофејот. Ние сме последни освојувачи, верувам дека ќе го дадеме максимумот, тоа е шанса за излез во Европа. Шансите се 50-50, можеби наша мала предност е што обезбедивме опстанок, а Силекс ќе треба да игра бараж. Но, финалето се игра да се победи и на таков начин ќе му пристапиме“, изјави тренерот Александар Васоски.
Ѓорѓи Стоилов најавува бескомпромисна борба и верува во успех.
„Веруваме дека можеме да го надиграме ривалот иако секако го респектираме тимот на Силекс. Финалето носи голем мотив, ќе се потрудиме да го освоиме“, истакна Стоилов.
