Манчестер Јунајтед одигра лудо второ полувреме, постигна пет гола и негативата од првиот дел (1-2) ја претвори во фантастичен триумф (6-2) на „Олд Трафорд“ против Рома. Англискиот тим со четири гола предност ќе патува на реваншот на „Олимпико“ во Рим. Вилјареал со 2-1 го совлада Арсенал и оваа полуфинална пресметка од Лигата на Европа е многу понеизвесна пред реваншот.
Бруно Фернандеш го доведе Манчестер Јунајтед во водство во деветтата минута, но потоа Рома постигна два гола преку Лоренцо Пелегрини од пенал во 15.минута и Един Џеко во 34.минута. Сепак, „ѓаволите“ го покажаа вистинското лице во вториот дел. Единсон Кавани израмни на 2-2 во 48.минута, а Уругваецот стрелаше и во 64.минута за целосен пресврт. Но, тоа не беше се.
Бруно Фернандеш од пенал зголеми на 4-2, набрзо погоди и Пол Погба, а конечниот резултат го постави Мејсон Гринвуд.
Вилјареал го совлада Арсенал со 2-1. Мануел Тригерос во петтата минута и Раул Албиол во 29.минута обезбедија предност од два гола за шпанскиот тим. Но, Арсенал намали од пенал преку Пепе во 73.минута. Дани Себалјос беше исклучен во 57.минута, а и Вилјареал остана со играч помалку во 80.минута поради исклучувањето на Етиен Капуе.
