Македонскиот прволигашки шампионат влегува во својата завршница и ако дилемите за врвот се веќе расчистени, тогаш е сериозно заплеткано во битката за опстанок. Еден клуб заедно со Беласица ќе мора директно да испадне, а уште два ќе играат бараж за опстанок.
На Силекс му „гори“, се наоѓа на десеттата позиција и има само еден бод повеќе од Вардар, кој во моментов е во опасната зона и би испаднал во второлигашка конкуренција. Токму затоа избраниците на Горан Симов и немаат друг избор освен да атакуваат на победа на денешната пресметка против Академија Пандев. Ова е воведен натпревар од 29.коло во Првата лига, но и предигра пред финалето на Купот кое е закажано за 19 мај, а ќе го играат овие две екипи. Сите останати мечево од 29. коло се закажани за утре.
Академија Пандев е малку побезбедна, но исто така се уште ги нема разрешено сите грижи околу опстанокот, посебно што сака да ги избегне и позициите што водат во бараж. Тимот на Александар Васоски во последното коло го победи Вардар (3-0), а и Силекс се сеќава на убедливиот триумф (6-0) против вардарци затоа што им е единствената радост во последните пет кола.
