Пелистер сака да се врати на победнички патеки по поразот од Работнички, а денеска (13 часот) под „Тумбе кафе“ во Битола гостува Силекс во 27. коло од Првата македонска фудбалска лига.
Пелистер со триумф веројатно би расчистил голем дел од дилемите околу опстанокот, а Силекс е во налет по успесите во низа. Голманот Давор Талевски очекува неизвесен натпревар, но и радост за битолчани.
„Овој натпревар е еден вид бараж и за нас и за нив. Во игра се значајни бодови и токму поради тоа верувам дека ќе биде позатворена игра. Од самиот почеток треба да дадеме до знаење дека одиме на победа. Се надевам на три бода и да продолжиме каде што застанавме со Вардар. Против Работнички не одговоривме на задачите онака како што треба, но секоја екипа има падови. Очекувам почеток на нова позитивна серија до крајот на првенството. Покажавме карактер оваа полусезона и овој натпревар е позначаен за нас, отколку за Силекс. Тие се во добра серија, но се ќе зависи само од нас“, вели Давор Талевски.
Вардар и Ренова исто така ќе имаат пресметка за опстанок, а во Струга домаќинот и Работнички ќе разигруваат околу можноста за излез во Европа. Третото место сепак го чува Македонија ЃП која денеска во Ѓорче Петров го пречекува Борец.
Лидерот Шкендија во Тетово го пречекува тимот на Академија Пандев, а Шкупи е домаќин на Беласица.
