Новиот светски клупски првак Челси веќе вложи 243 милиони евра во летниот преоден рок, но планира нов крупен потег. Главна трансферна цел на лондончани сега е 22-годишниот офанзивец на Астон Вила, Морган Роџерс, кој е проценет на околу 80 милиони фунти (околу 93 милиони евра).
Роџерс имаше извонредна сезона во Премиер – лигата со осум голови и десет асистенции во 37 натпревари, што му донесе и повик во англиската репрезентација, за која веќе има четири настапи. Играч со широк офанзивен спектар, кој може да делува зад напаѓачот и на обете крила.
Челси веќе го засили тимот со Жоао Педро, Лијам Делап и Џејми Биноа-Гитенс, но амбициите за титула во новата сезона ги тераат „сините“ да продолжат со инвестиции.
Иако Астон Вила не сака да се раздели со Роџерс, финансискиот притисок поради прекршувањата на финансискиот фер-плеј и отсуството од Лигата на шампиони може да ги натера на продажба. Како дел од понудата, Челси размислува да го вклучи и напаѓачот Николас Џексон, кој се очекува да го напушти клубот ова лето.
Дополнителен притисок доаѓа од УЕФА, која веќе ги казни двата клуба – Челси со 30 милиони евра, а и Астон Вила е под закана поради нарушени финансиски правила. Доколку Челси не го балансира буџетот, ризикува да не може да ги регистрира новите засилувања за европските натпреварувања.
