Фудбалската федерација на Македонија (ФФМ) на редовна седница донесе важни одлуки поврзани со организацијата во македонскиот фудбал, меѓу кои се усвои нов систем за натпреварувања во Првата, Втората и Третите регионални лиги на Македонија, а истиот ќе важи од сезоната 2026/27.
Најсилната македонска лига од 2026/27 ќе се намали од 12 на 10 екипи, додека Втората лига се намалува на 14 клубови. Според новиот систем на ФФМ, од Првата лига ќе испаднат екипите кои ќе бидат пласирани на 10, 11 и 12. место во шампионатот, додека осмата и деветтата екипа ќе играат бараж за опстанок.
Од Втората лига следната сезона ќе испаднат дури пет екипи, кои ќе бидат пласирани од 12. до 16. место, додека од деветта до 11. позиција ќе играат бараж за опстанок.
