Сите ние сме МАКЕДОНИЈА! Со храбро срце до реми против Белгија – ФФМ со „благодарам“ за навивачите!

Македонската фудбалска репрезентација вчера одигра одличен натпревар против моќната Белгија на националната Арена „Тоше Проески“ во Скопје. Во рамките на квалификациите за СП 2026, избраниците на Благоја Милевски ремизираа 1-1, иако со малку среќа можевме да стигнеме и до сензационална победа.

Околу 30.000 навивачи на трибините беа сведоци на една од најдобрите партии на нашите „црвено-жолти“ во последниве години. Енергијата на публиката, поддршката до последниот свиреж и единството кое се чувствуваше, беа нешто што ретко се гледа. Барди, Елмас, Миовски, Џани, Столе и целата репрезентација оставија срце на терен, играјќи со жар и дисциплина.

Сето тоа не можеше да помине незабележано. Денеска Фудбалската федерација на Македонија, предводена од претседателот Масар Омерагиќ, испрати големо „благодарам“ до народот, навивачите и сите кои беа дел од фудбалскиот спектакл.

„Вие сте нашата сила. Ви благодариме за поддршката, ова е наш заеднички пат кон нови успеси!“, се вели во пораката од ФФМ.

Јасно е – новата енергија во ФФМ носи нов дух и во репрезентацијата. Се гледа посветеност, професионалност и јасна цел – Македонија да биде постојан учесник на големите натпреварувања.

Следната станица е Астана, натпревар со Казахстан в понеделник, од каде сите очекуваме нови три бода. Но она што вчера го видовме во Скопје, веќе е победа сама по себе. Вака се гради национален тим, вака се гради нација!

Фото: ФФМ официјален фејсбук