Барселона направи огромен чекор кон полуфиналето на Лигата на шампионите откако на свој терен ја декласира Борусија Дортмунд со убедливи 4-0. На стадионот „Монжуик“, Каталонците одиграа извонреден натпревар и стекнаа значителна предност пред реваншот во Германија.
Рафиња го отвори резултатот во 25. минута, а Роберт Левандовски во вториот дел ја покажа својата класа со два гола – првиот во 48., а вториот во 66. минута. Крајниот резултат го постави младиот Ламин Јамал со погодок во 77. минута, по одлична асистенција токму од Рафиња.
Во вториот четвртфинален натпревар одигран вечерва, Пари Сен Жермен обезбеди солидна предност од 3-1 против англиската Астон Вила, пред реваншот на „Вила Парк“. Гостите од Англија први дојдоа до водство преку Морган Роџерс во 35. минута, но парижани експресно одговорија – само четири минути подоцна Дезире Дуе погоди за израмнување.
Во второто полувреме, Квича Кварацхелија со мајсторска соло акција ја врати предноста за ПСЖ, а во самиот финиш од натпреварот, Нуно Мендеш го постигна третиот гол и ги постави конечните 3-1.
Барселона и ПСЖ се наоѓаат во одлична позиција пред реваншите и веќе може да сонуваат за пласман меѓу најдобрите четири екипи на Стариот континент.
