Скандалот што се случи меѓу Жозе Мурињо и Окан Бурук по истанбулското дерби имаше огромен одек низ целиот свет.
Фенербахче и Галатасарај играа во четвртфиналето од Купот на Турција, а гостите победија со 1-2 и се пласираа во полуфиналето. Големото дерби повторно донесе многу непријатни сцени, жестока тепачка на теренот пред да заврши натпреварот, а потоа и по крајот на мечот.
Големо внимание привлече потегот на Мурињо, кој му пријде на тренерот на Галата и го фати за нос. Сега, пак, се откриени деталите од овој инцидент.
Според информациите на „Милијет“, Мурињо по последниот свиреж им пришол на судиите и им рекол: „Лошо го судевте натпреварот.“
Окан Бурук, честитајќи им на судиите, возвратил: „Не му верувајте. Одлично го водевте натпреварот. Донесовте правилни одлуки.“
По разговорот со судиите, Окан Бурук се свртел кон Мурињо и му рекол: „Добар натпревар“, со што очигледно го испровоцирал славниот тренер.
Се тврди дека Окан Бурук тогаш му упатил навреда на Мурињо на англиски, по што португалскиот тренер не можел да го задржи бесот. Жозе Мурињо му пришол одзади и го стиснал за нос, по што добил црвен картон и без објаснување го напуштил стадионот.
Сите инциденти се вклучени во извештајот на судијата, така што ќе следат казни за сите инволвирани, а најмногу за клубовите.
