Фудбалерите на Реал Мадрид во средата го освоија Интерконтиненталниот куп на ФИФА, кој се одржа во Катар. Во финалето што се одигра во Лусаил, актуелните европски шампиони со убедлива победа од 3-0 ја совладаа мексиканската Пачука и го освоија новиот трофеј. Капитенот на Реал, Лука Модриќ, ги одигра последните 20 минути и на крајот го подигна пехарот.
На социјалните мрежи стана вирално видео од соблекувалната на Реал, каде Килијан Мбапе, воодушевен од достигнувањето на Модриќ, изјавува:
„Па, има повеќе трофеи отколку јас години!“, изјави Французинот, насмејувајќи ги своите соиграчи.
Видеото веднаш привлече големо внимание меѓу фудбалските фанови.
Лука Модриќ оваа сезона има одиграно 25 натпревари со вкупно 1111 минути на теренот. Неговиот договор со Реал важи до крајот на сезоната, а со оваа победа тој го освои својот 28. трофеј во дресот на „кралевите“.
Во 122-годишната историја на клубот, ниту еден друг фудбалер нема освоено повеќе трофеи. Дани Карвахал има еден трофеј помалку, додека Начо, кој го напушти клубот летово, има два помалку. На 25 трофеи за Реал се и Марсело и Карим Бензема.
